اسلام آباد ( یو این آئی نیوز):پاکستان تحریک انصاف (پی ٹی آئی) نے پنجاب میں ضمنی انتخابات سے قبل مبینہ دھاندلی کے خلاف الیکشن کمیشن میں درخواست دائر کردی جس میں حکمراں جماعت پاکستان مسلم لیگ (ن) کو فریق بنایا گیا ہے۔
تفصیلات کے مطابق پی ٹی آئی کی جانب سے ضمنی انتخابات میں قبل از انتخاب دھاندلی کے خلاف الیکشن کمیشن میں درخواست مرکزی ایڈیشنل سیکریٹری جنرل عمر ایوب خان، ریاض فتیانہ اور افتخار درانی نے دائر کی ہے۔درخواست گزار نے پاکستان مسلم لیگ (ن) کو فریق بناتے ہوئے کہا ہے کہ وہ ضمنی انتخابات کے لیے جاری مہم میں فعال ہیں اور اس دوران کئی خلاف ورزیاں دیکھیں اور ایسی چیزیں ہو رہی ہیں جو شفاف اور غیرجانبدار انتخابات کی راہ میں رکاوٹ ہیں۔انہوں نے کہا کہ الیکشن کمیشن پر لازم ہے کہ وہ قانون کے مطابق آزادانہ، شفاف اور غیرجانبدارانہ انتخابات کروائے.
دوسری جانب رہنما پی ٹی آئی فواد چوہدری کا کہنا ہے کہ ن لیگ کے 19 امیدواروں کے خلاف الیکشن کمیشن میں درخواست دی ہے، آرٹیکل 62 ایف کے تحت 19 حلقوں کے ن لیگ کے امیدوار الیکشن لڑنے کے اہل نہیں ہیں۔
فواد چوہدری نے اپنے بیان میں کہا ہے کہ ہماری درخواست ہے کہ یہ 19 لوگ الیکشن لڑنے کے اہل نہیں ہیں، تمام حلقوں میں ن لیگ کا ورکر ان کے ساتھ نہیں اس لیے آدھی کابینہ سے استعفیٰ دلوانا پڑا، امید ہے کہ الیکشن کمیشن ایک سے دو دن میں ہماری درخواست پر فیصلہ کر دے گا۔
ان کا کہنا ہے کہ ایکس اور وائے کو صرف یہ کرنا ہے کہ وہ کچھ نہ کریں۔
فواد چوہدری نے کہا کہ ملک انقلاب کے لیے تیار ہے، چاہتے ہیں کہ ووٹ سے انقلاب کی طرف بڑھیں، ملک کی اشرافیہ کو حالات سمجھنے کی ضرورت ہے، ووٹ کے ذریعے تبدیلی عوام کا حق ہے۔
انہوں نے کہا کہ عام انتخابات ہی واحد راستہ ہے، ہم نے عوام کو حکمرانوں کے محلات کی طرف جانے سے روکا ہوا ہے، اگر انقلاب کو روکا گیا تو حالات مختلف ہوں گے۔
فواد چوہدری کا کہنا ہے کہ دھاندلی کا بیانیہ بار بار سامنے آ رہا ہے، مظفر گڑھ میں ہمارے امیدوار معظم جتوئی کے خلاف مقدمہ درج کیا گیا ہے۔
انہوں نے پیٹرولیم مصنوعات کی قیمتوں پر بات کرتے ہوئے کہا کہ عالمی منڈی میں تیل سستا ہوا، پیٹرول کی قیمتیں 150 روپے فی لیٹر ہونی چاہئیں۔
سابق وفاقی وزیر کا وزیرِ اعلیٰ پنجاب حمزہ شہباز سے متعلق بات کرتے ہوئے کہنا ہے کہ 22 تاریخ کو حمزہ شہباز وزیرِ اعلیٰ نہیں ہوں گے، حمزہ شہباز ابھی خانہ پُری کے لیے ہیں۔
فواد چوہدری نے وفاقی وزیرِ داخلہ سے متعلق کہا کہ رانا ثناء اللّٰہ گھنٹہ گھر چوک میں ایک گھنٹہ کھڑے ہو جائیں تو پورے فیصل آباد کے شناختی کارڈ بلاک کرنا پڑیں گے۔
