راولپنڈی ( ٰ یو این آئی نیوز)آرمی چیف جنرل قمر جاوید باجوہ نے گذشتہ روزبلوچستان کے علاقے پنجگور کا دورہ کیا۔ انھوں نے پورا دن ان فوجیوں کے ساتھ گزارا جنہوں نے 2 فروری کو پنجگور میں سیکورٹی فورسز کے کیمپ پر دہشت گردوں کے حملے کو پسپا کیا تھا۔آئی ایس پی آر کے مطابق پنجگور پہنچنے پر، آرمی چیف جنرل قمر جاوید باجوہ کو مقامی کمانڈر نے علاقے میں سیکورٹی کی صورتحال اور ابھرتے ہوئے خطرات سے مؤثر طریقے سے نمٹنے کے طریقہ کار کے بارے میں تفصیلی طور پر آگاہ کیا ۔
فوجیوں کے ساتھ بات کرتے ہوئے، آرمی چیف نے حالیہ دہشت گردی کی سرگرمیوں کے خلاف زمینی دستوں کی پیشہ وارانہ مہارت اور موثر ردعمل کو سراہا۔انھوں نے بلوچستان اور مقامی آبادی کی حفاظت اور ان کے تحفظ کو یقینی بنانے کے خلاف کی جانے والی کوششوں کو ناکام بنانے کے لیے کی گئی آپریشنل تیاریوں اور انکے اعلیٰ معیار کو برقرار رکھنے کی ضرورت پر زور دیا۔آرمی چیف نے مادر وطن کے دفاع کے لیے فرض شناسی میں عظیم قربانی پر شہدا کو خراج تحسین پیش کیا۔
بعدازاں پنجگور کے معززین اور قبائلی عمائدین کے ساتھ بات چیت کرتے ہوئے، آرمی چیف جنرل قمر جاوید باجوہ نے دہشت گردی کی لعنت سے لڑنے میں قانون نافذ کرنے والے اداروں کی حمایت پر ان کی تعریف کی۔ انھوں نے کہا کہ دہشت گردوں اور ان کے ہمدردوں/سپورٹ بیس کے درمیان گٹھ جوڑ توڑنا دہشت گردی کو شکست دینے کے لیے ناگزیر ہے،
انھوں نے مقامی عمائدین کو علاقے کی خوشحالی اور ترقی کے لیے ماحول پیدا کرنے خاص طور پر جاری سماجی اقتصادی ترقی کے منصوبوں کی بروقت تکمیل کو یقینی بنانے کے لیےپاک فوج کی جانب سے ہر ممکن تعاون کا یقین دلایا۔ آرمی چیف نے کہا کہ چیلنجز سے قطع نظر دہشت گردوں کو مشکل سے حاصل کردہ فوائد کو نقصان پہنچانے کی اجازت نہیں دی جائے گی۔قبل ازیں پنجگور آمد پر کور کمانڈر کوئٹہ لیفٹیننٹ جنرل سرفراز علی نے آرمی چیف کا استقبال کیا ۔
