اسلا م آباد(یو این ائی)پاکستان تحریک انصاف نے پارٹی چیئرمین عمران خان کی اہلیہ بشریٰ بی بی سے منسوب ڈائری کے معاملے پر ردعمل دیا ہے۔
ایک بیان میں ترجمان پی ٹی آئی نے بشریٰ بی بی سے منسوب مبینہ ڈائری اور اُس کے متن کی مکمل تردید کردی۔
ترجمان نے مزید کہا کہ چیئرمین پی ٹی آئی کی اہلیہ کا اس ڈائری سے کوئی تعلق نہیں، ڈائری نہ تو بشریٰ بی بی کی ہے اور نہ ہی وہ اس متن کی تصدیق کرتی ہیں۔
ترجمان پی ٹی آئی نے یہ بھی کہا کہ اس طرح کے اقدام دراصل مسائل خصوصاً حکومتی فسطائیت سے توجہ ہٹانے کی ناکام کوشش ہیں۔
ان کا کہنا تھا کہ یہ ظلم و جبر اور آئین اور قانون کی پامالی سے توجہ ہٹانے کی ناکام کوشش ہے، جتنی مرضی سازشیں کرلیں، سازشی عناصر کو بالاخر عوام کے کٹہرے میں کھڑا ہونا ہے۔
واضح رہے کہ چیئرمین پی ٹی آئی کی اہلیہ بشریٰ بی بی کی مبینہ ڈائری سامنے آئی تھی۔ بشریٰ بی بی کے اپنے ہاتھوں سے لکھی ڈائری ثابت کرتی ہے کہ چیئرمین پی ٹی آئی ان کے مکمل تسلط میں ہیں۔
ڈائری سے ثابت ہوتا ہے کہ چیئرمین پی ٹی آئی بشریٰ بی بی کے احکامات پر چلتے ہیں۔
یہ بات اِن الفاظ سے ظاہر ہوتی ہے جس میں بشریٰ بی بی چیئرمین پی ٹی آئی کو سیاسی ڈکٹیشن کرا رہی ہیں۔
