راولپنڈی ( یو این آئی نیوز) چیف آف آرمی سٹاف جنرل قمر جاوید باجوہ کا کہنا ہے کہ کسی بھی ابھرتے ہوئے چیلنج کا مقابلہ کرنے کے لیے موثر جوابی کاروائی کی صلاحیت نہایت ضروری ہے جس کے لیےہمیں اپنی پیشہ ورانہ ذمہ داریوں اور تربیت پر توجہ مرکوزرکھنا ہو گی ، آئی ایس پی آر کے مطابق آرمی چیف نے ان خیالات کا اظہار نگرپار کے دورے کے موقع پر کیا ،
آرمی چیف نے پورا دن فوجی افسروں اور جوانوں کے ساتھ گزارا، اس موقعہ پرمقامی کمانڈر نے فارمیشن کی آپریشنل تیاریوں کے بارے میں چیف آف آرمی سٹاف کو بریفنگ دی ۔ بعدازاں فوجیوں کے ساتھ بات چیت کرتے ہوئے آرمی چیف نے تفویض کردہ مشن کی تکمیل کے لیے ان کے بلند حوصلےکی تعریف کی۔ انہوں نے تمام فوجیوں کو نصیحت کی کہ وہ کسی بھی ابھرتے ہوئے چیلنج کا مقابلہ کرنے کے لیے موثر جواب دینے کی غرض سے اپنی پیشہ ورانہ ذمہ داریوں اور تربیت پر توجہ مرکوز رکھیں۔
نگر پار کے دورے کے دوران آرمی چیف جنرل قمر جاوید باجوہ نے مقامی ہندو برادری سے بھی ملاقات کی۔ انہوں نے کہا کہ پاکستان میں اقلیتی برادری کوبرابر کے حقوق حاصل ہیں اور ان کی حفاظت کرنا ریاست کی ذمہ داری ہے۔ ہندو برادری نے ملک میں اقلیتوں کے لیے محفوظ ماحول فراہم کرنے میں پاکستان کی کوششوں کا اعتراف کیا۔ انہوں نے عہد کیا کہ ہندو برادری ملک کی معاشی خوشحالی کے لیے پورے جوش و جذبے کے ساتھ اپنا حصہ ڈالے گی۔کور کمانڈر کراچی اور ڈائریکٹر جنرل پاکستان رینجرز (سندھ) بھی دورے کے دوران آرمی چیف کے ہمراہ تھے۔
