لاہور ( یو این آئی نیوز) پاکستان مسلم لیگ ن نے ملک میں فوری نئے الیکشن کا مطالبہ کر دیا ۔ یہ مطالبہ ن لیگ کے صدر میاں شہباز شریف نے گذشتہ روز یہاں پی ڈی ایم کے سربراہ مولانا فضل الرحمن کے ہمراہ میڈیا سے گفتگو کرتے ہوئے کیا، قبل ازیں دونوں رہنمائوں کے درمیان ملاقات ہوئی جس میں ملک کی سیاسی صورتحال اور اپوزیشن کی آئندہ کی حکمت عملی پر غور کیا گیا اورایک دوسرے سے گلے شکوے بھی کیے گئے ، بعدازاں میڈیا سے گفتگو کرتے ہوئے پی ڈی ایم کے سربراہ مولانا فضل الرحمان نے کہا ہے کہ تمام ادارے تباہ ہوچکے ہیں۔ مولانا فضل الرحمان کا کہناتھا کہ پی ڈی ایم اپنے اہداف کے حصول کیلئے سنجیدہ اور متحرک ہے، ہمیں مل کرآگے بڑھنا ہے۔ ، 16 اکتوبر کو فیصل آباد میں تاریخی اجتماع ہوگا اس کے بعد 31 اکتوبر کو ڈیرہ غازی خان(ڈی جی خان) میں بڑا اجتماع ہو گا۔انہوں نے کہا کہ اتنا نقصان تو بھارتی وزیراعظم نریندرا مودی نہیں پہنچا سکتا تھا جتنا عمران خان نے پہنچا دیاہے ۔ انھوں نے کہا کہ 16 ہزاربرطرف ملازمین کے ساتھ یکجہتی کا اظہارکرتے ہیں۔برطرف ملازمین کے ساتھ کھڑے ہیں۔پی ڈی ایم سربراہ کا کہنا تھا کہ کسان،مزدورسمیت ہرطبقہ پریشان ہے، عوام پر قہر بن کر حکومت مسلط ہے، حکومت سے خلاصی ہر آدمی کی آرزو بن چکی ہے۔اس موقع پر مسلم لیگ ن کے صدر میاں محمد شہباز شریف کا کہنا تھا کہ ڈینگی نے ملک میں تباہی مچائی ہوئی ہے، حکومت غفلت کی نیند سو رہی ہے، ملک میں ایسے بدترین حالات کبھی نہیں دیکھے، ملک میں فوری شفاف انتخابات کرائے جائیں، شفاف الیکشن ہی پاکستان کوترقی کی جانب لے جانے کا راستہ ہے، عوام پربجلی اورگیس بم گرائے جا رہے ہیں۔ انھوں نے کہا کہ دن رات محنت کر کے 2018ء کی صورتحال پر واپس آئیں گے، شفاف انتخابات پی ڈی ایم اورعوام کامطالبہ ہے۔ میاں شہباز شریف نے اس موقع پر مولانا کے اعزاز میں پرتکلف ظہرانہ بھی دیا، ظہرانے میں مولانا کے کھانے میں مٹن بریانی، مٹن قورمہ، پالک گوشت، آلو مٹر شامل تھے، کھانے کی میز پر روغنی نان، روٹی۔ دیسی مرغی مٹن چکن، بار بی کیو، گرل فش، کشمیری دال چاول ،ریشمی کباب،یخنی پلائو بھی شامل تھے۔
