اسلام آباد( یو این آئی نیوز)پاکستان نے سعودی عرب کے جازان ایئر پورٹ پر حوثی ملیشیاء کے ڈرون حملے کی شدید مذمت کی ہے ۔ہفتہ کو ترجمان دفتر خارجہ کی جانب سے جاری بیان میں کہا گیا ہے کہ پاکستان سعودی عرب کے شہر جازان میں کنگ عبداللہ ایئر پورٹ پر حوثی ملیشیاء کے حالیہ ڈرون حملے کی شدید مذمت کرتا ہے ۔جس کے نتیجہ میں بعض افراد زخمی ہوئے اور املاک کو بھی نقصان پہنچا۔ انہوں نے کہا کہ ہم زخمیوں کی جلد صحت یابی کیلئے دعا گو ہیں ۔ ترجمان دفتر خارجہ نے کہا کہ اس طرح حملے نا صرف بین الاقوامی قوانین کی خلاف ورزی ہیں بلکہ ان سے سعودی عرب اور خطے میں امن و سلامتی کو بھی خطرات درپیش ہیں۔ترجمان دفتر خارجہ نے سعودی عرب کی سالمیت اور سکیورٹی کے خلاف کسی قسم کے خطرہ میں پاکستان کی جانب سے ہر طرح کے مکمل تعاون اور حمایت کا بھی اعادہ کیا۔
