اسلام آباد( یو این آئی نیوز) پاکستان کے دورے پر آئی کینیڈا کی نائب وزیر خارجہ مارٹا مورگن نے گذشتہ روزآرمی چیف جنرل قمر جاوید باجوہ سے یہاں ملاقات کی۔آئی ایس پی آر کے مطابق ملاقات میں باہمی دلچسپی کے امور، مختلف شعبوں میں دوطرفہ تعاون، مجموعی علاقائی صورتحال اور افغانستان میں انسانی ہمدردی کی بنیاد پر اقدامات میں تعاون پر تبادلہ خیال کیا گیا۔ آرمی چیف نے اس موقع پر کہا کہ پاکستان دوطرفہ روابط کی روایت کو برقرار رکھنے کا خواہاں ہے اور کینیڈا کے ساتھ طویل المدتی اور کثیر المقاصد پائیدار تعلقات کے قیام کا خواہاں ہے۔آرمی چیف نے انسانی بحران سے بچنے کے لیے افغانستان پر عالمی تعاون کی اشد ضرورت کا اعادہ کیا۔ کینڈین نائب وزیر خارجہ نے افغانستان میں انخلاء کے آپریشن، علاقائی استحکام میں پاکستان کے کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔
