اسلام آباد (یو این آئی نیوز)وزیراعظم عمران خان اور چیف آف آرمی سٹاف جنرل قمر جاوید باجوہ نے گذشتہ روز نوشکی بلوچستان کا دورہ کیا۔ گورنر اور وزیر اعلی بلوچستان کے علاوہ وفاقی اور صوبائی وزراء بھی اس دورے میں وزیراعظم کے ہمراہ تھے۔وزیراعظم کو علاقے کی سیکیورٹی صورتحال پر تفصیلی بریفنگ دی گئی۔ اس موقع پر وہاں تعینات فوجیوں کے ساتھ بات چیت کرتے ہوئےوزیر اعظم نے پاکستان کے لیے لازوال قربانیوں پر شہدا اور ان کے خاندانوں کو زبردست خراج تحسین پیش کیا۔ وزیر اعظم نے فوجیوں کی پیشہ وارانہ مہارت کی تعریف کی اور آپریشنل تیاریوں اور ان کی بہادری کو سراہا جس کا مظاہرہ کرتے ہوئے دہشت گردوں کے حملوں کو پسپا کیا گیا۔ وزیراعظم نے بلوچستان کی ترقی کو سبوتاژ کرنے کی کوشش میں ملوث دہشت گردوں اور ان کی باقیات کے خاتمے کے لیے مسلح افواج کی حمایت کے لیے قومی عزم کا اعادہ کیا۔وزیراعظم نے کہا کہ ’’ جامع قومی کوششوں کے علاوہ وفاقی اور صوبائی حکومتوں کے درمیان تعاون اور مسلح افواج کی مدد سے ہم بلوچستان کی حقیقی صلاحیتوں کو بروئےکار لائیں گے‘‘۔بعد ازاں وزیر اعظم نے علاقے کے قبائلی عمائدین سے بھی بات چیت کی اور دہشت گردی کے خلاف جنگ میں ان کی غیر متزلزل حمایت کو سراہتے ہوئے ان کی جانب سےبلوچستان میں خوشحالی اور ترقی کے حوالے سے حکومتی اقدامات کی حمایت اور سہولت کی فراہمی کا اعتراف کیا۔ انہوں نے جرگے کے اراکین کو بلوچستان میں ترقیاتی منصوبوں کی بروقت تکمیل کے لیے وفاقی حکومت کی جانب سے مخلصانہ تعاون جاری رکھنے کا یقین دلایا۔ وزیراعظم نے زور دیا کہ بلوچستان کی ترقی پاکستان کے مستقبل کے لیے نہایت اہم اور ان کی حکومت کی ترجیح ہے۔
