راولپنڈی(یو این آئی نیوز )پاک فوج کی جانب سے چیرمین پی ٹی آئی عمران خان کے بیان پر شدید رد عمل، ادارے خاص طور پر ایک اعلیٰ فوجی افسر کے خلاف الزامات کوبے بنیاد اور غیر ذمہ دارانہ قرار دے دیا ۔۔
آئی ایس پی آر سے جاری بیان کے مطابق چیرمین پی ٹی آئی کے ادارے بلخصوص ایک اعلی فوجی افسر پر لگائے گئے الزامات قطعی طور پر غیر ضروری اور ناقابل قبول ہیں۔ بیان میں کہا گیا ہے کہ پاکستان آرمی ایک انتہائی پیشہ ور اور نظم و ضبط کا حامل ادارہ ہے اور اسے اپنی ان خصوصیات پر فخر ہے۔
پاکستان آرمی کا ایک مضبوط اور انتہائی موثر اندرونی احتسابی نظام ہے جو کہ ہر باوردی فوجی پر غیر قانونی کارروائیوں میں ملوث ہونے پر بلا امتیاز لاگو ہوتا ہے۔بیان کے مطابق اگر رینک اینڈ فائل کی عزت، وقار، اورسیفٹی کو مذموم مقاصد کے لیے فضول الزامات کے ذریعے ٹارگٹ کرنے کی کوشش کی گئی تو ادارہ اپنے افسروں اور جوانوں کی حفاظت کرے گا، چاہے جو بھی قیمت ادا کرنی پڑ ے۔
ادارے اور اس کے افسران پر لگائے گئے بے بنیاد الزامات انتہائی افسوسناک اور قابل مذمت ہیں۔ آئی ایس پی آر کاکہنا ہے کہ کسی کو بھی ادارے یا اس کے سپاہیوں کی بے عزتی کرنے کی اجازت نہیں دی جائے گی۔ اس بات کو مدنظر رکھتے ہوئے پاک فوج کی جانب سے حکومت سے درخواست کی گئی ہے کہ وہ اس معاملے کی تحقیقات کرے اور بغیر کسی ثبوت کے ادارے اور اس کے افسران کے خلاف ہتک عزت اور جھوٹے الزامات کے ذمہ داروں کے خلاف قانونی کارروائی کا آغاز کرے۔
