اسلام آباد( یو این آئی نیوز) : پاکستان ڈیموکریٹک موومنٹ (پی ڈی ایم) اور اتحادی جماعتوں نے چیئرمین پاکستان تحریک انصاف (پی ٹی آئی) عمران خان کو نااہل کرانےکے لیے سپریم کورٹ میں ریفرنس دائر کرنے کا فیصلہ کیا ہے ۔ پی ڈی ایم اور اتحادی جماعتوں کا سربراہی اجلاس گذشتہ روز وزیر اعظم ہاوس میں منعقد ہوا ،
ذرائع کے مطابق اجلاس میں پی ٹی آئی ممنوعہ فنڈنگ کیس سے متعلق الیکشن کمیشن کے فیصلے پر تفصیلی غور کیا گیا اور آئندہ کے لائحہ عمل پر مشاورت کی گئی۔ذرائع کے مطابق اجلاس میں فیصلہ کیا گیا کہ عمران خان کو نااہل کرانے کے لیے سپریم کورٹ میں ریفرنس دائر کیا جائےگا، ریفرنس آرٹیکل62 اور 63 کے تحت دائرکیا جائےگا۔ذرائع نے بتایا ہے وفاقی کابینہ سے آج ممنوعہ فنڈنگ کیس پر سپریم کورٹ میں ریفرنس دائر کرنے کی منظوری لی جائے گی ، وفاقی کابینہ الیکشن کمیشن کے فیصلے پرکارروائی اور طریقہ کارکا فیصلہ بھی کرے گی، تحریک انصاف کے بے نامی اکاؤنٹس اور کرمنل کیسز سے متعلق کارروائی کا فیصلہ بھی آج ہی کے اجلاس میں کیا جائےگا۔
ذرائع کے مطابق عمران خان اور دیگر قیادت کا نام ای سی ایل میں ڈالنے کے متعلق بھی کابینہ سے منظوری لی جائے گی ۔ اجلاس میں فیصلہ کیا گیا کہ تحریک انصاف سمیت کسی کو بھی ریڈ زون میں احتجاج نہیں کرنے دیا جائےگا، کوئی احتجاج کرنا چاہتا ہے توریڈ زون کے باہرجہاں مرضی کرلے۔واضح رہے کہ تحریک انصاف نےآج چیف الیکشن کمیشن کمشنر کے خلاف الیکشن کمیشن کےباہر احتجاج کا اعلان کر رکھا ہے ،
