بیجنگ( یو این آئی مانیٹرنگ )وزیراعظم عمران خان چینی قیادت کی خصوصی دعوت پر اعلیٰ سطحی وفد کے ہمراہ 4 روزہ سرکاری دورے پر جمعرات کو بیجنگ پہنچ گئے ۔ وزیراعظم آفس کے میڈیا ونگ کی طرف سے جاری بیان کے مطابق چین کے سفیر وو جائی اور چین میں پاکستان کے سفیر معین الحق نے وزیر اعظم کا ہوائی اڈے پراستقبال کیا۔وزیر اعظم بیجنگ سرمائی اولمپکس 2022 کی افتتاحی تقریب میں شرکت کے علاوہ صدر شی جن پنگ اور وزیراعظم لی کی چیانگ کے ساتھ دو طرفہ امور پر ملاقاتیں کریں گے۔ ان ملاقاتوں میں دونوں برادر ممالک کے مابین خصوصاً سی پیک فریم ورک کے تحت تجارتی اور اقتصادی تعاون کو فروغ دینے سے متعلق امور پر تبادلہ خیال کے ساتھ ساتھ اہم علاقائی اور بین الاقوامی امور زیر بحث آئیں گے۔اس موقع پر وزیراعظم چین کے ممتاز کاروباری رہنماؤں، سرکردہ تھنک ٹینکس، دانشوروں اور میڈیا کے نمائندوں سے آن لائن ملاقاتوں کے علاوہ دیگر اہم دو طرفہ ملاقاتوں میں بھی شریک ہوں گے۔
