راولپنڈی ( یو این آئی نیوز)
آرمی چیف جنرل قمر جاوید باجوہ نے کہا ہے کہ بلوچستان کے عوام نے ترقی اور استحکام کے لیے بڑی قربانیاں دی ہیں، بلوچستان کا امن اور خوشحالی اولین ترجیح ہے اور پاک فوج صوبے میں جاری سماجی و اقتصادی منصوبوں کے لیے پرامن ماحول فراہمی کی ہر ممکن کوشش کرے گی،آئی ایس پی آر کے مطابق آرمی چیف نے گذشتہ روز تربت کا دورہ کیا۔جہاں انھیں بلوچستان کی سیکیورٹی صورتحال اور بارڈر مینجمنٹ کے اقدامات کو یقینی بنانے پر تفصیلی بریفنگ دی گئی۔
اس موقع پر آرمی چیف نے فوجیوں کے حوصلے اور آپریشنل تیاریوں کو سراہا اور دہشت گردوں کے خلاف کامیاب کارروائیوں پر اطمینان کا اظہار کیا۔بعد ازاں انھوں نے تربت یونیورسٹی کا دورہ کیا اور ضلع کیچ سے تعلق رکھنے والے معاشرے کے تمام طبقات کے نمائندوں کی ایک بڑی تعداد کے ساتھ ایک تفصیلی بات چیت کی جس میں مقامی رہنما/معروف، قبائلی عمائدین، طلباء، وکلاء اور خواتین شامل تھیں۔ انھوں نے کہا کہ بلوچستان کے نوجوان بہت باصلاحیت ہیں اور انہیں اپنی تعلیم اور ہنرمندی کی ترقی کے لیے دستیاب مواقعوں سے فائدہ اٹھانا چاہیے۔ انھوں نے نوجوانوں کو مقامی قانون نافذ کرنے والے اداروںمیں شامل ہونے اور علاقے کی سلامتی اور استحکام میں اپنا حصہ ڈالنے کی بھی ترغیب دی۔
آرمی چیف نے اس موقف کا اعادہ کیا کہ بلوچستان کا امن اور خوشحالی اولین ترجیح ہے اور پاک فوج بلوچستان میں آبادی کی بہتری کے لیے جاری سماجی و اقتصادی منصوبوں کے لیے پرامن ماحول فراہم کرنے کے لیے ہر ممکن کوشش کرے گی۔۔ انھوں نے کہا کہ بلوچستان کے عوام نے ترقی اور استحکام کے لیے بڑی قربانیاں دی ہیں۔ جامع قومی کوششوں کے ذریعے بلوچستان کی حقیقی صلاحیت کو بروئے کار لایا جائے گا، قبل ازیں تربت پہنچنے پر کور کمانڈر کوئٹہ لیفٹیننٹ جنرل سرفراز علی نے آرمی چیف کا استقبال کیا۔
